അസാധ്യമായിട്ടൊന്നുമില്ല – ആത്മവിശ്വാസം ആർജ്ജിച്ചു കേരളം

അസാധ്യമായിട്ടൊന്നുമില്ല എന്ന ആത്മവിശ്വാസം കേരളത്തിന് പകരുന്ന നേട്ടമാണ് ഇന്നലെ നാം കൈവരിച്ചത്. കേരളത്തിലെ 19,489 പഞ്ചായത്ത്/നഗരസഭാ വാർഡുകളിൽ 19093 ഉം, 1034 തദ്ദേശ സ്വയം ഭരണ സ്ഥാപനങ്ങളിൽ 1021 ഉം മാലിന്യമുക്തമായി പ്രഖ്യാപിച്ച വിവരം സന്തോഷപൂർവ്വം അറിയിക്കട്ടെ. സംസ്ഥാനത്തെ 97.96 % വാർഡുകളും 98.47% തദ്ദേശ സ്വയം ഭരണ സ്ഥാപനങ്ങളുമാണ് മാലിന്യമുക്തമായി പ്രഖ്യാപിച്ചത്. സർക്കാർ നിർദേശിച്ച 13മാനദണ്ഡങ്ങളിൽ ഓരോന്നിലും 80% പുരോഗതി കൈവരിച്ചാണ് അന്താരാഷ്ട്ര സീറോ വേസ്റ്റ് ദിനത്തിൽ 934 ഗ്രാമപഞ്ചായത്തുകൾ, 82 മുൻസിപ്പാലിറ്റികൾ, അഞ്ച് കോർപറേഷനുകൾ എന്നിവ മാലിന്യമുക്തമായതായി പ്രഖ്യാപിക്കപ്പെട്ടത്. ഓരോ തദ്ദേശ സ്വയം ഭരണ സ്ഥാപനത്തിന്റെ പുരോഗതിയും വിവിധ മേഖലയിലുള്ളവർ അടങ്ങുന്ന വിദഗ്ദ്ധ സമിതി പരിശോധിച്ച് മാർക്കിട്ടാണ്, മാലിന്യമുക്തമായി പ്രഖ്യാപിക്കാൻ യോഗ്യരാണെന്ന് ഉറപ്പാക്കിയത്. ഇങ്ങനെ 99.26 % ഗ്രാമ പഞ്ചായത്തുകളും 94.25% നഗരസഭകളും മാലിന്യമുക്തമായി പ്രഖ്യാപിക്കപ്പെട്ടു. മാലിന്യ മുക്ത പഞ്ചായത്തുകളും നഗരസഭകളുമായി പ്രഖ്യാപിക്കപ്പെട്ട എല്ലാ തദ്ദേശ സ്വയം ഭരണ സ്ഥാപനങ്ങളെയും അഭിനന്ദിക്കുന്നു. ഈ പ്രവർത്തനത്തിൽ പങ്കാളികളായ എല്ലാവരെയും സർക്കാരിന് വേണ്ടി അഭിവാദ്യം ചെയ്യുന്നു.
ജനകീയാസൂത്രണം, സമ്പൂർണ സാക്ഷരത യജ്ഞം ഇവയ്ക്ക് ശേഷം ഏറ്റവും ജനകീയമായി നടന്ന ക്യാമ്പയിനാണ് മാലിന്യമുക്തം നവകേരളവുമായി ബന്ധപ്പെട്ട് നാം നടത്തിയത്. തദ്ദേശ സ്വയം ഭരണ സ്ഥാപനങ്ങളുടെ നേതൃത്വത്തിൽ വിവിധ വകുപ്പുകളുടെ സഹകരണത്തോടെ ഏറ്റെടുത്ത ക്യാംപയിനാണ് അവസാനഘട്ടത്തിലേക്ക് കടക്കുന്നത്. ക്യാമ്പയിന്റെ പ്രാരംഭ ഘട്ടത്തിൽ വലിയരീതിയിലുള്ള വെല്ലുവിളികൾ നേരിട്ടിരുന്നു. മിനി എം സിഎഫുകൾ സ്ഥാപിക്കുന്നതിനുപോലും വലിയ ജനപ്രതിരോധങ്ങൾ നേരിടേണ്ടിവരുന്നു. പക്ഷെ ഈ സാഹചര്യത്തിൽ നിന്നും കേരളം ഒരുപാട് മാറി. ശേഷം സുൽത്താൻ ബത്തേരിയും ആലപ്പുഴയും ഗുരുവായൂരും തുടങ്ങി ഒറ്റപ്പെട്ട വിജയമാതൃകകൾ ഉണ്ടായി വരാൻ തുടങ്ങി. ഈ ക്യാമ്പയിൻ ഏറ്റവും വഴിത്തിരവായിമാറിയത് ബ്രഹ്മപുരം തീപിടുത്തമാണ്. ബ്രഹ്മപുരത്തുണ്ടായ ആപത്തിനെ ഒരവസരമാക്കിമാറ്റാൻ സാധിച്ചു. ഇതിലൂടെ കൈവരിക്കാൻ സാധിച്ച നേട്ടങ്ങൾ ചെറുതല്ല. ഇതൊക്കെ കാണിക്കുന്നത് ഈ ക്യാമ്പയിനിന്റെ ഭാഗമായുണ്ടായ കൂട്ടായ പ്രവർത്തനത്തിന്റെ ഫലമാണ്. ഒത്തു ചേർന്നാൽ ഒന്നും അസാധ്യമല്ലെന്ന് ഈ ക്യാമ്പയിൻ തെളിയിക്കുന്നു.
മാർച്ച് മാസത്തിൽ ഹരിതമിത്രം ആപ്പിലെ കണക്കനുസരിച്ച് ഈ മാസം ഇതുവരെ 87,75,713 വീടുകളിലും സ്ഥാപനങ്ങളിലുമാണ് ഹരിതകർമ്മ സേന എത്തി അജൈവ മാലിന്യം ശേഖരിച്ചത്. ഹരിത മിത്രം ആപ്പ് ഉപയോഗിക്കാത്ത 15 തദ്ദേശ സ്വയം ഭരണ സ്ഥാപനങ്ങൾ ഒഴികെയുള്ളവരുടെ കണക്കാണിത്.
കേരളത്തിന് പുറത്ത് ഇൻഡോർ പോലുള്ള ചില മാതൃകകൾ എല്ലാവരും ചൂണ്ടിക്കാട്ടാറുണ്ട്. ഇൻഡോർ ഒരു മികച്ച മാതൃകയാണ് താനും, പക്ഷേ ഒരൊറ്റ നഗരത്തിന്റെ മാത്രം വിജയഗാഥയാണ്. ഇൻഡോറിന് ചുറ്റുമുള്ള സ്ഥലങ്ങളൊന്നും ആ നേട്ടം കൈവരിച്ചിട്ടില്ല. ഇൻഡോർ ഉൾപ്പെടുന്ന മധ്യപ്രദേശിനും ആ നേട്ടം കൈവരിക്കാനായിട്ടില്ല. ഇവിടെ ഒരു സംസ്ഥാനത്തിനു മുഴുവൻ കൈവരിക്കാൻ കഴിഞ്ഞ നേട്ടമാണ് ഇത് എന്നതാണ് പ്രത്യേകത.
മാലിന്യക്കൂനകളില്ലാത്ത സംസ്ഥാനമെന്ന ലക്‌ഷ്യം നേടുകതന്നെ ചെയ്യും. ആകെയുള്ള 59 മാലിന്യക്കൂനകളിൽ 24 എണ്ണം പൂർണമായും നീക്കം ചെയ്തു, ഇങ്ങനെ 56.95 ഏക്കർ ഭൂമി വീണ്ടെടുത്തു. ബ്രഹ്മപുരം ഉൾപ്പെടെ 10 എണ്ണത്തിലെ പണി അവസാനഘട്ടത്തിൽ. ബാക്കിയുള്ള സ്ഥലത്ത് പ്രവർത്തനം ആരംഭിച്ചിട്ടുണ്ട്
ഈ ക്യാമ്പയിന്റെ നേട്ടം 100 ശതമാനത്തിലെത്തിക്കാൻ ഇനിയുള്ള ദിവസങ്ങളിൽ കഴിയും എന്ന ആത്മവിശ്വാസം പകരുന്നതാണ് ഈ വസ്തുതകളെല്ലാം. അതുകൊണ്ട് പ്രവർത്തനങ്ങൾ ഒട്ടും വിട്ടുവീഴ്ചയില്ലാതെ ഇനിയും തുടരും. മാലിന്യമുക്തമായവ നിലനിർത്താനും, അല്ലാത്ത പ്രദേശങ്ങളെ മാലിന്യമുക്തമാക്കാനുമുള്ള വിപുലമായ പ്രവർത്തന പദ്ധതിയും നടപ്പിലാക്കും. എല്ലാത്തരം മാലിന്യത്തിന്റെയും പരിപാലനം, സമ്പൂർണമായ ഡിജിറ്റൽ ട്രാക്കിംഗ്, പുനർചംക്രമണ പാർക്കുകൾ എന്നിവയിലും കൂടുതൽ ശ്രദ്ധ ചെലുത്തും.
കേരളത്തെ മാലിന്യമുക്തമാക്കാനുള്ള പ്രവർത്തനത്തിൽ ഏവരുടെയും സഹകരണം പ്രതീക്ഷിക്കുന്നു